Mae hwn yn brosiect cydweithredol rhwng Arloesi Gwynedd Wledig a Pharc Cenedlaethol Eryri.  Prif nod y prosiect hwn oedd ail-greu Cysawd yr Haul o fewn ffiniau Gwynedd. Crëwyd Llwybr Cysawd yr Haul Eryri gan blant o ysgolion lleol ac artistiaid lleol. Aethant ati i greu gosodiadau celf o bob planed, a osodwyd wedyn mewn busnesau ledled Gwynedd.

Gwnaed hyn trwy osod planedau mewn busnesau o amgylch Gwynedd, gan ddefnyddio cymhareb pellteroedd. Mae’r model yn ffordd effeithiol o osod maint Cysawd yr Haul yn ei gyd-destun ac mae’n ychwanegu gwerth at statws Gwarchodfa Awyr Dywyll Eryri.

Nid yw maint y planedau i raddfa, ond mae’r gymhareb o’u pellter o’r Haul wedi’i raddio. Ar y raddfa hon, cafodd Cysawd yr Haul ei grebachu o ffactor o gant a deugain miliwn i un. (140,000,000 i un).

Dyfarnwyd statws Gwarchodfa Awyr Dywyll i Barc Cenedlaethol Eryri ym mis Rhagfyr 2015. Yn dilyn hyn, rydym yn annog pawb i ddysgu mwy am gysawd yr haul trwy fynd allan ac ymweld â’r gweithiau celf hyn.

Esboniodd Helen Pye o Barc Cenedlaethol Eryri: “Mae’r dynodiad yn wobr bwysig iawn, rydym wedi profi bod ansawdd ein awyr y nos yn rhagorol ac mae ymdrechion gwirioneddol yn cael eu gwneud i leihau llygredd golau.”

Drwy osod y planedau creadigol artistig mewn busnesau o amgylch Gwynedd, caiff llwybr ei greu i bobl ei ddilyn. Ym mhob stop, byddwch yn dysgu am y blaned benodol ac yn deall mwy am raddfa Cysawd yr Haul, tra hefyd yn ymweld â mannau o Wynedd na fyddech efallai wedi bod ynddynt o’r blaen.