Mae’r prosiect yma yn un sydd wedi cael ei ariannu drwy Gronfa Peilota Gwynedd, sef Cronfa sydd wedi cael ei dargedu at grwpiau cymunedol yng Ngwynedd i’w galluogi i dreialu gweithgareddau newydd yn eu cymunedau.

Mae Tafarn yr Heliwr Cyf yn Fenter Cymdeithasol Er Budd y Gymuned gyda’r bwriad o brynu ac ail-agor Tafarn yr Heliwr yn Nefyn fel Tafarn Cymunedol.

Prif amcan y fenter ydi dod â’r gymuned yn agosach at ei gilydd cyn, yn ystod ac wedi i nhw lwyddo i agor yr hwb cymunedol; cynnig cyfleon gwirfoddoli a chyflogedig yn lleol gan gyfrannu at yr economi. Eu gweledigaeth yw bydd yr hwb cymunedol yn darparu amrediad o wasanaethau i’r gymuned ac yn cynnig caffi/bar; llety ar ffurf byncws cyfforddus a rhesymol a bwydlen syml sy’n gwneud y mwyaf o’r cynnyrch sydd ar gael yn lleol.

Mi roedd y fenter yn llwyddiannus efo’u cais i’r Gronfa Peilota i dderbyn cymorth ariannol i gomisiynu arbenigwr i gynyrchu Cynllun Busnes ar gyfer y dafarn gymunedol. Roedd cael Cynllun Busnes manwl yn hollbwysig i’r fenter yma er mwyn  asesu oblygiadau ariannol llawn y prosiect ac asesu cynaliadwyedd ariannol y prosiect yn y tymor hir, gan roi sicrwydd i’r Pwyllgor ag unrhyw gyrff ariannu bydd cais yn cael ei gyflwyno am gefnogaeth ariannol, fod y Cynllun Busnes yn un cynaliadwy ar gyfer y dyfodol a chynnig gwerth am arian.

Cafodd y Cynllun Busnes ei orffen mis Gorffennaf 2018 a chafodd ei gyflwyno i’r cyhoedd, roedd hyn yn golygu y gallai’r grwp ei ddefnyddio wrth iddynt fynd ymlaen efo’u ymgyrch gwerthu siars cymunedol i atgyfnerthu eu gweledigaeth o ail-agor y dafarn fel Tafarn cymunedol.

Erbyn hyn, mae’r gymuned wedi llwyddo i brynu’r dafarn drwy gasglu dros £85,000 drwy gynnigion siars. Yn ddiweddar, mae Tafarn yr Heliwr wedi gwneud cais am nawdd gan Gwmni Calor fel rhan o Gronfa Gymunedol Wledig. Byddai’r pres yn mynd tuag at beintio tu allan yr adeilad, arwyddion newydd, goleuadau a basgedi blodau.

Mae copi o’r Cynllun Busnes ar gael yma: Tafarn yr Heliwr- Cynllun Busnes